ᓯᕗᓕᖅᑎ ᐄᕙ ᐋᕆᐊᒃ ᐅᓪᓗᒥ ᐅᑯᓂᖓ ᐅᖃᐅᓯᑦᓴᖃᖅᑲᐅᔪᖅ:
ᒫᒃ ᑲᓗᐊᖅ ᐃᓚᖏᓐᓄᑦ ᐱᒃᑯᒋᕙᑦᓰᕈᒪᔪᖓ ᒫᑦ ᐃᓅᒍᓐᓃᖅᓯᒪᓕᖅᑎᓪᓗᒍ ᐃᓕᓴᕆᔭᐅᓚᐅᕐᓂᖓᓄᑦ
ᓄᓇᕗᒻᒥ ᖁᑦᑎᓂᖅᐹᒧᑦ ᐃᓕᓴᕆᔭᐅᔾᔪᑎᒧᑦ.
ᒫᒃ ᓯᕗᓕᖅᑎᐅᓚᐅᖅᑐᖅ ᓄᓇᕗᒻᒥ ᐃᓕᓐᓂᐊᖅᑎᑦᓯᕙᑦᑐᓂ ᐃᔾᔪᐊᖅᑕᐅᓂᒃᑯᑦ, ᐅᑉᐱᕐᓇᐃᓐᓇᖅᑐᓂ ᓱᓕᔪᕐᓇᐃᓐᓇᖅᑐᓂᓗ.
ᒫᒃ ᐃᖅᑲᐅᒪᒋᔭᐅᓂᐊᖅᑐᖅ ᐅᖃᐅᓯᓕᕆᓂᕐᒧᑦ ᖃᐅᔨᒪᔨᑕᐅᓚᐅᕐᓂᖓ, ᐃᓕᓐᓂᐊᖅᑎᑦᓯᔨᐅᓂᖓ, ᐅᓂᒃᑳᑦᓯᐊᕈᓐᓇᕐᓂᖓᓗ, ᑕᐃᒃᑯᐊ ᐅᓂᒃᑳᑦᓴᕆᕙᓚᐅᖅᑕᖏᑦ ᓱᓕ ᐆᒻᒪᐃᓐᓇᕐᓂᐊᖅᑐᑦ ᐆᒻᒪᑎᑦᑎᓐᓂ ᐃᓱᒪᑦᑎᓐᓂᓗ. ᓄᓇᕗᑦ ᒐᕙᒪᒃᑯᖏᑦ ᖁᔭᓕᓯᒪᔪᑦ ᒫᒃ ᐊᑐᖃᑦᑕᓚᐅᕐᖓᑦ ᐱᔪᓐᓇᕐᓂᕐᒥᓂᒃ ᖃᐅᔨᒪᓂᕐᒥᓂᓪᓗ ᐃᑲᔪᕈᑎᒋᓪᓗᓂᒋᑦ ᐱᒻᒪᕆᐅᓂᖅᐹᓄᑦ ᐱᓕᕆᕕᑦᑎᓐᓄᑦ, ᐃᓕᓐᓂᐊᕐᓂᓕᕆᔨᒃᑯᓐᓄᑦ, ᐃᖅᑲᓇᐃᔭᖃᑦᑕᓚᐅᕐᖓᑦ ᓇᓗᓇᐃᖅᓯᓯᒪᒐᓱᐊᖅᑐᓂ ᐃᓄᐃᑦ ᖃᐅᔨᒪᔭᑐᖃᖏᑦ ᐊᑐᐃᓐᓇᐅᓂᖅᐹᖑᖁᓪᓗᒋᑦ ᐃᓕᓐᓂᐊᖅᑎᑦᓯᒍᑕᐅᕙᑦᑐᓂ.
ᐃᓕᓴᕆᔭᐅᒍᑎ ᖁᑦᑎᓂᖅᐹᖑᓪᓗᓂ ᐃᓕᓴᕆᔭᐅᒍᑎᐅᔪᖅ ᓄᓇᕗᒻᒥ ᖁᑦᑎᓂᖅᐹᖑᓪᓗᓂᓗ ᐊᓯᖏᓕᒫᖏᓐᓂᒃ ᐃᓕᓴᕆᔭᐅᔾᔪᑎᓂᒃ ᐅᔭᒥᑕᐅᒍᑎᓂᒃ ᑐᓂᔭᐅᕙᑦᑐᓂᒃ ᓄᓇᕗᑦ ᒐᕙᒪᒃᑯᖏᓐᓂᒃ.
